Mayın 29-dа səfirlik Respublika Günü münasibəti ilə Daşkəndin ali təhsil ocaqlarının azərbaycanlı tələbələrinin iştirakı ilə təntənəli bayram mərasimi keçirmişdir.
Tələbələr Azərbaycan xalqının Ümummilli lideri Heydər Əliyevin səfirlik ərazisindəki büstü önünə gül dəstələri qoydular.

Səfir Namiq Abbasov öz nitqində müsəlman Şərqində ilk demokratik res-publikanın mövcud olduğu qısa müddət ərzində dövlət quruculuğu və demokratik dəyərlərin tətbiqi sahəsində böyük uğurlarını vurğuladı, 1991-ci ildə müstəqilliyini bərpa etmiş Azərbaycan Respublikasının qazandığı nailiyyətləri geniş şərh etdi.  Qeyd edildi ki, Azərbaycan bu gün dünya birliyinə cəsarətlə inteqrasiya edir, beynəlxalq mövqelərini möhkəmləndirir, regional və beynəlxalq əhəmiyyətli layihələrin təşəbbüskarı və fəal icraçısı kimi şıxış edir. Natiq 20 ildən  artıq davam edən Ermənistan-Azərbaycan, Dağlıq Qarabağ münaqişəsində Ermənistanın qeyri-konstruktiv mövqeyini göstərdi. Azərbaycan Respublikasının ərazi bütövlüyünün danışıqlar mövzusu ola bilməyəcəyini vurğulayan səfir beynəlxalq səviyyədə sərgilənən ikili standartların problemin həllində başlıca əngəl olduğunu qeyd etdi.
Qonaqlara “Bakı axşamları” fotosərgisi təqdim olundu. Tələbələr tərəfindən maraqla qarşılanan sərgidə son dövrlərdə Bakı şəhərində aparılan tikinti-quruculuq, restavrasiya işlərini əyani şəkildə göstərən fotoşəkillər nümayiş etdirilmişdir.

Tədbirə toplaşanlara Heydər Əliyev Fondunun hazırladığı “Qarabağ həqiqətləri” bukletlər toplusu, Azərbaycanın işğal olunmuş ərarizlərinin xəritəsi, işğal edilmiş Aərbaycan ərazilərinin azad edilməsi barədə BMT-nin qətnamələrinin mətni çoxaldılaraq paylanmışdır. Bundan əlavə səfir N.Abbasovun 28 may bayram mərasimindəki nitqinin mətni də tələbələrə paylanmışdır.
Mərasim ziyafət və “Özbəyim yoşları” (“Özbək gəncləri”) folklor-rəqs ansamblının ifasında Azərbaycan və özbək mahnı və rəqslərindən ibarət konsert proqramı ilə davam etdi.  Qeyd etmək lazımdır ki, 2009-cu ildə Bakıda keçirilən I Muğam festivalının qalibi özbək müğənnisi Yulduz Turdiyeva məhz “Özbək gəncləri” ansamblının yetirməsidir və respublikada keçirilən konsertlərdə “Qarabağ şikəstəsi”, digər Azərbaycan muğam və mahnıları ilə iştirak edir.
Tədbir kütləvi informasiya vasitələrində geniş işıqlandırılmışdır.
AzTV televiziya kanalının “Xəbərlər” proqramında mərasimdən ətraflı reportaj; AzərTaC, TurkistonPress informasiya agentliklərində elektron infor-masiya saytlarında tədbir barədə məlumat verilmişdir.