Azərbaycan Respublikasının Prezidenti İlham Əliyev mayın 16-da Prezident sarayında “Hess Korporasiyası”nın idarə heyətinin sədri və baş icraçı rəhbəri Con Hessin rəhbərlik etdiyi nümayəndə heyətini qəbul etmişdir. Con Hess rəhbərlik etdiyi korporasiyanın Azərbaycanda fəaliyyət göstərməsindən və ölkəmizin tərəfdaşı olmasından böyük məmnunluğunu ifadə etdi. Qonaq “Hess Korporasiyası”nın ölkəmizdə görəcəyi gələcək işlər barədə dövlətimizin başçısına məlumat verdi. Prezident İlham Əliyev Azərbaycanda xarici şirkətlərin fəaliyyəti üçün olduqca əlverişli şəraitin yaradıldığını vurğuladı, ölkəmizin təşəbbüsü və iştirakı ilə həyata keçirilən qlobal enerji və nəqliyyat layihələrinin dünyanın enerji təhlükəsizliyi sistemində mühüm rol oynadığını bildirdi.